‘ਭਾਰਤ ਜੋੜੋ’ ਦਾ ਅਸਰ ਲੇਹ ਦੀਆਂ ਸੜਕਾਂ ’ਤੇ ਵੀ : ਰਾਹੁਲ
ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਰਾਹੁਲ ਗਾਂਧੀ ਨੇ ਕੰਨਿਆ ਕੁਮਾਰੀ ਤੋਂ ਕਸ਼ਮੀਰ ਤੱਕ ਆਪਣੀ ‘ਭਾਰਤ ਜੋੜੋ ਯਾਤਰਾ’ ਨੂੰ ਯਾਦ ਕਰਦਿਆਂ ਕਿਹਾ ਹੈ ਕਿ ਇਸ ਦਾ ਲੋਕਾਂ ’ਤੇ ਭਾਰੀ ਅਸਰ ਪਿਆ ਹੈ ਅਤੇ ਇਹੀ ਕਹਾਣੀ ਲੇਹ ਦੀਆਂ ਸੜਕਾਂ ’ਤੇ ਵੀ ਗੂੰਜਦੀ ਹੈ। ਰਾਹੁਲ ਅੱਜਕਲ ਲੇਹ-ਲੱਦਾਖ ਦੇ ਦੌਰੇ ’ਤੇ ਹਨ। ਉਹ ਉੱਥੇ ਦੇ ਲੋਕਾਂ ਨਾਲ ਸੰਪਰਕ ਕਰ ਕੇ ਵੋਟਰਾਂ ਨੂੰ 2024 ਦੀਆਂ ਆਮ ਚੋਣਾਂ ’ਚ ਕਾਂਗਰਸ ਨੂੰ ਜਿਤਾਉਣ ਦੀ ਅਪੀਲ ਕਰ ਰਹੇ ਹਨ। ਇਸ ਸਮੇਂ ਲੇਹ ਦੀ ਲੋਕ ਸਭਾ ਸੀਟ ਭਾਜਪਾ ਕੋਲ ਹੈ।
ਰਾਹੁਲ ਨੇ ਕਿਹਾ ਕਿ ‘ਭਾਰਤ ਜੋੜੋ’ ਹਰ ਭਾਰਤੀ ਦੇ ਦਿਲ ਅਤੇ ਦਿਮਾਗ ਵਿੱਚ ਡੂੰਘਾਈ ਨਾਲ ਵਸਿਆ ਹੋਇਆ ਹੈ। ਲੇਹ ਦੀਆਂ ਸੜਕਾਂ ’ਤੇ ਗੂੰਜਦਾ ‘ਭਾਰਤ ਮਾਤਾ ਕੀ ਜੈ’ ਦਾ ਨਾਅਰਾ ਇਸ ਏਕਤਾ ਦੀ ਮਜ਼ਬੂਤ ਮਿਸਾਲ ਹੈ। ਪਿਆਰ ਅਤੇ ਸਦਭਾਵਨਾ ਨਾਲ ਭਰੀ ਇਸ ਆਵਾਜ਼ ਨੂੰ ਕੋਈ ਸ਼ਕਤੀ ਦਬਾਅ ਨਹੀਂ ਸਕਦੀ।
