ਸ਼ਰਾਬ ਦੀ ਪੈਕਿੰਗ ’ਤੇ ਹੁਣ ਪੋਸ਼ਕ ਤੱਤਾਂ ਦਾ ਜ਼ਿਕਰ ਨਹੀਂ ਕਰ ਸਕਣਗੇ ਨਿਰਮਾਤਾ

ਭਾਰਤੀ ਖੁਰਾਕ ਸੁਰੱਖਿਆ ਅਤੇ ਮਾਪਦੰਡ ਅਥਾਰਿਟੀ (ਐੱਫ. ਐੱਸ. ਐੱਸ. ਏ. ਆਈ.) ਨੇ ਅਲਕੋਹਲ ਬੈਵਰੇਜਿਜ਼ ਯਾਨੀ ਸ਼ਰਾਬ ਆਦਿ ਲਈ ਨਿਯਮਾਂ ’ਚ ਬਦਲਾਅ ਕੀਤਾ ਹੈ। ਅਲਕੋਹਲ ਬੈਵਰੇਜਿਜ਼ ’ਤੇ ਪੋਸ਼ਕ ਤੱਤਾਂ ਦੀ ਮੌਜੂਦਗੀ ਨਾਲ ਸਬੰਧਤ ਕੋਈ ਸੂਚਨਾ ਨਹੀਂ ਦਿੱਤੀ ਜਾਏਗੀ ਅਤੇ ਨਿਰਮਾਤਾ ਸਿਰਫ ਕੈਲੋਰੀ ’ਚ ‘ਐਨਰਜੀ’ ਦੀ ਮਾਤਰਾ ਦਾ ਸਵੈਇਛੁੱਕ ਐਲਾਨ ਹੀ ਕਰ ਸਕਣਗੇ। ਐੱਫ. ਐੱਸ. ਐੱਸ. ਏ. ਆਈ. ਨੇ ਖੁਰਾਕ ਸੁਰੱਖਿਆ ਅਤੇ ਮਾਪਦੰਡ (ਅਲਕੋਹਲ-ਬੈਵਰੇਜਿਜ਼) ਪਹਿਲੀ ਸੋਧ ਨਿਯਮ, 2023’ ਜਾਰੀ ਕੀਤਾ ਹੈ। ਇਹ ਨਿਯਮ ਅਗਲੇ ਸਾਲ ਇਕ ਮਾਰਚ ਤੋਂ ਲਾਗੂ ਹੋਵੇਗਾ। ਐੱਫ. ਐੱਸ. ਐੱਸ.ਏ. ਆਈ. ਨੇ ਕਿਹਾ ਕਿ ਅਲਕੋਹਲ ਬੈਵਰੇਜਿਜ਼ ’ਤੇ ਕੈਲੋਰੀ ’ਚ ‘ਐਨਰਜੀ’ ਦੀ ਮਾਤਰਾ ਨੂੰ ਛੱਡ ਕੇ ਪੋਸ਼ਣ ਸਬੰਧੀ ਕੋਈ ਜਾਣਕਾਰੀ ਦਰਜ ਨਹੀਂ ਹੋਵੇਗੀ।

ਐਨਰਜੀ ਨਾਲ ਸਬੰਧਤ ਅਜਿਹਾ ਐਲਾਨ ਸਵੈਇੱਛੁਕ ਹੋਵੇਗਾ। ਖੁਰਾਕ ਸੁਰੱਖਿਆ ਅਤੇ ਮਾਪਦੰਡ (ਅਲਕੋਹਲ ਬੈਵਰੇਜਿਜ਼) ਨਿਯਮ, 2018 ਵਿਚ ਕਿਹਾ ਗਿਆ ਸੀ ਕਿ ਅਲਕੋਹਲ ਵਾਲੇ ਬੈਵਰੇਜਿਜ਼ ਦੇ ਲੇਬਲ ’ਤੇ ਕੋਈ ਪੋਸ਼ਣ ਸਬੰਧੀ ਜਾਣਕਾਰੀ ਨਹੀਂ ਹੋਣੀ ਚਾਹੀਦੀ। ਇਸ ’ਚ ਸਿੰਗਲ ਮਾਲਟ ਵ੍ਹਿਸਕੀ ਅਤੇ ਸਿੰਗਲ ਗ੍ਰੇਨ ਵ੍ਹਿਸਕੀ ਨੂੰ ਵੀ ਪਰਿਭਾਸ਼ਿਤ ਕੀਤਾ ਗਿਆ ਹੈ।